దొడ్డి కొమురయ్య తెలంగాణ సాయుధ పోరాట,ఆద్యుడు, ఆదర్శం. -దేవుని ఎర్రవలిలో కురుమ సంఘము సభ ఏర్పాటు

చేవెళ్ల డిసెంబర్ 01 (ప్రజా పాలన):-

చేవెళ్ల మండల కేంద్రంలోని దేవుని ఎర్రవల్లి గ్రామంలో గురువరం కురుమ సభ ఏర్పాటు చేశారు. ఈ కార్యక్రమనికి ముఖ్య అతిధిగా తెలంగాణ కురుమ సంఘ పెద్దలు కృష్ణగోని సదానందం పాల్గొన్నారు.
ఈ సందర్భంగా వారు మాట్లాడుతూ,
తెలంగాణ రైతాంగ సాయుధ,పోరాటానికి ఆద్యుడు *తొలి అమరుడు దొడ్డి కొమరయ్య అని  కొనియాడారు.
తెలంగాణ సాయుధ పోరాటం ప్రారంభమవడానికి భూమికోసం, భుక్తికోసం, విముక్తి ఉద్యమంగా పోరాటం మారడానికి దొడ్డి కొమరయ్య అమరత్వమే ప్రధాన కారణం. తెలంగాణ సాయుధ పోరాటం చరిత్ర అని తలుచుకోగానే మొదటగా స్ఫురణకు వచ్చే వ్యక్తి దొడ్డి కొమరయ్య. ఉమ్మడి వరంగల్ జిల్లాలోని కడివెండి గ్రామంలో ఒక సాధారణ కురుమ కులానికి చెందిన గొర్రెల కాపరుల కుటుంబములో జన్మించిన కొమరయ్య ఒక మహోన్నత ఉద్యమానికి ఆద్యుడవడం తెలంగాణ ప్రజలకు గర్వకారణం.
అప్పట్లో నిజాం పాలనలో తెలంగాణలోని గ్రామాల్లో జాగీర్దార్లు, దేశ్ ముఖ్ లు, భూస్వాములు, దేశ్ పాండేలు మొదలైన దొరల దురాగతాల కారణంగా విసిగి వేసారిన ప్రజలకు ఆంధ్రమహాసభ కమ్యూనిస్టుల సంఘం ఒక దివిటీ లాగా కనిపించేది. దొడ్డి కొమరయ్య సోదరుడు దొడ్డి మల్లయ్య కూడా ఆంధ్రమహాసభ కమిటీ సభ్యుడిగా పనిచేసేవాడు. తన అన్న ప్రభావం చేతనూ, దొరల దురాగతాలు ఎదిరించడానికి ఆంధ్రమహాసభయే చక్కని వేదిక అని గ్రహించిన కొమరయ్య కూడా సంఘంలో చేరి దొరలకు వ్యతిరేకంగా పోరాటాలు సాగించేవాడు.